Вкупно 229 милиони денари или 3,7 милиони евра ќе подели Министерството за животна средина на општини, невладини организации или образовни и научни институции кои ќе аплицираат во новата Програма за инвестирање во животната средина за 2025 година. Министерот за животна средина Изет Меџити денеска на прес конференција ја промовираше програмата и најави дека средствата кои се обезбедени од еколошката такса за регистрација на моторни возила се поделени во четири категории, а рокот за аплицирање е три недели.
Сто милиони денари се наменети за изработка на техничка документација за канализациони системи и пречистителни станици за отпадни води, 100 милиони за изработка на техничка документација за водоводни системи, десет милиони за образовни и истражувачки развојни проекти и 19 милиони за подигнување на јавната свест едукација и обуки за животна средина.
„Средствата се наменети за општини, здруженија, правни и физички лица, невладини организации, научни и образовни институции. Сумата се обезбедува од наплатата на еколошката такса при регистрација на моторни возила, а годинава е двапати зголемена од претходните. Рокот за аплицирање за сите заинтересирани е три недели, а обрасците може да се најдат на веб страната на министерството. Сите апликации ќе ги разгледаува жири комисија и резултатите ќе се објават на страната на министерството“, рече Меџити.
Тој ги повика сите технолошки и стартап компании да аплицираат со иновативни решенија за подобрување на животната средина и посочи дека ова е можност и поддршка за сите кои имаат капацитет и желба да придонесат за почиста вода, поздрава почва, бидоиверзитет и свест за животната средина. Меџити најави дека за различните апликанти постојат засебни видови на формулари и обрасци, за да се олесни процесот на аплицирање и да се обезбеди фер пристап.