Вкупно 11 македонски државјани побарале помош за евакуација од Израел поради влошената безбедносна состојба, информираат од Министерството за надворешни работи преку Амбасадата во Тел Авив.
Поради затворањето на воздушниот простор и прекинот на цивилните летови, нивното извлекување во моментов е отежнато и ќе зависи од развојот на безбедносната ситуација во наредните денови.
Како алтернативна опција се разгледува евакуација со брод од израелското пристаниште Ашдод до Лимасол на Кипар, за што македонската амбасада е во постојана координација со израелските власти и со нашите државјани на терен.
Дел веќе евакуирани
Претходно, една група македонски граѓани беше евакуирана со владин авион, а вкупниот број заинтересирани за напуштање на Израел е поголем, но не сите се подготвени веднаш да ја напуштат земјата.
Континуирана комуникација со амбасадата
Од МНР велат дека дипломатското претставништво во Тел Авив е во постојан контакт со македонските државјани и стои на располагање до нивното безбедно извлекување.
Граѓаните кои имаат потреба од помош можат да се обратат на дежурните СОС-телефони на Министерството и на амбасадата.
Министерството повторно апелира македонските државјани да се воздржат од патувања во земјите од Блискиот Исток додека трае кризата.