Државниот секретар Марко Рубио го нарече овогодинешниот состанок на НАТО „Самит на Трамп“, додека алијансата се подготвува да го исполни барањето на претседателот Доналд Трамп за зголемување на трошоците за одбрана, пренесува Политико.
„Јас би го нарекол ова Самитот на Трамп“, рече во ексклузивно интервју со Даша Бернс од Политико на маргините на самитот, велејќи дека притисокот на Трамп за зголемување на трошоците во неговиот прв мандат ја оживеал групата – во најголем дел.
„Комбинацијата од притисок од претседателот Трамп во неговата прва администрација, а потоа и целосна инвазија и војна во Европа од страна на Владимир Путин доведе до тоа практично секоја земја во, секој партнер во алијансата на НАТО, да се обврзе да ја достигне таа граница од 5 проценти, со исклучок, за жал, на Шпанија.“, посочи Рубио.
Шпанија се најде под критики на овогодинешниот самит откако премиерот Педро Санчез обезбеди исклучок во последен момент од целта за трошоци за одбрана.
„Тоа е голем проблем. Не мислам дека договорот што го постигна Шпанија е одржлив и, искрено, ги става во многу тешка положба во однос на нивните други сојузници и партнери.“, изјави државниот секретар Марко Рубио.
Тој додаде дека тоа ќе биде тема на дискусија кога лидерите ќе се сретнат во среда. Ставот на Шпанија им обезбеди покритие на другите нации кои исто така се желни да се извлечат од обврската.
Во меѓувреме, влијанието на Трамп ќе биде од корист за алијансата, рече тој.
„Ако сите се придржуваат до својата обврска, тоа ќе биде многу посилен сојуз со поспособни партнери“, рече тој. „[Тоа] искрено ќе им овозможи на Соединетите Држави сè уште да бидат жива, силна членка на него, најголема членка на него, но исто така да ги прераспределат ресурсите во други делови од светот без да ја намалат силата на алијансата.“