И премалку и премногу сон се поврзани со забрзано биолошко стареење на мозокот и другите органи, според студија во која учествувале половина милион луѓе.
Ново истражување објавено во списанието „Nature“ покажа дека и недоволниот и прекумерниот сон може да бидат поврзани со забрзано биолошко стареење на мозокот, срцето, белите дробови и имунолошкиот систем.
Студијата ја водеше Џунхао Вен од Колеџот за лекари и хирурзи Вагелос при Универзитетот Колумбија, а беа анализирани податоците на околу половина милион учесници од базата на податоци Biobank.
Резултатите ја покажаа таканаречената U-крива на врската помеѓу спиењето и стареењето, луѓето кои спијат помалку од шест часа, но и оние кои спијат повеќе од осум часа на ден, покажаа знаци на побрзо стареење. Најповолни резултати беа забележани кај испитаници кои спијат помеѓу 6,4 и 7,8 часа.
Авторите нагласуваат дека ова не значи дека спиењето директно предизвикува стареење, туку укажува на силна врска помеѓу времетраењето на спиењето и општото здравје на организмот.
Студијата, исто така, ја наведува поврзаноста на краткиот сон со депресија, анксиозност, дебелина, дијабетес тип 2, хипертензија и срцеви заболувања. И прекраткиот и предолгиот сон се поврзани со болести на белите дробови и дигестивниот систем.
Дополнителни анализи покажаа дека краткиот сон може да има подиректно влијание врз оптоварувањето со болести, додека долгиот сон почесто се поврзува со депресивни промени и биолошка нерамнотежа.
фото/Depositphotos