Палмер: Македонија направи сè што побара ЕУ, бугарската блокада создава лош преседан

Македонија направила сè што Европската унија побарала од неа за напредок кон членството, а бугарската блокада создава лош преседан за целиот регион, оцени поранешниот специјален претставник на САД за Западен Балкан, Метју Палмер во интервју за МРТ.

Тој смета дека билатералните спорови не треба да го попречуваат пристапниот процес и очекува поактивна улога од Брисел и од клучните земји членки.

„Она што можам да го кажам е дека Македонија направи сè што Европската унија побара од неа за да напредува кон членството. Сметам дека е крајно жално што Бугарија е во позиција да го блокира тој процес за Скопје. Тоа создава лош преседан за регионот“, изјави Палмер за МРТ.

Според него, последиците од блокадата се чувствуваат и кај другите земји кандидати, кои го следат македонското искуство и се прашуваат со какви дополнителни услови би можеле да се соочат.

„Белград го следи искуството на Скопје и се прашува што би можеле да побараат Загреб или Букурешт во пристапниот процес. Тоа ги обесхрабрува земјите кандидати да ги спроведат неопходните реформи“, предупреди тој.

Палмер изрази надеж дека Бугарија ќе покаже воздржаност, а Европската унија ќе инсистира билатералните прашања да не го оптоваруваат проширувањето.

Зборувајќи за можната американска помош, тој потсети дека лично бил вклучен во претходните обиди за надминување на блокадата, кога бугарските барања почнале да го попречуваат европскиот пат на Скопје.