Министерството за внатрешни работи упати апел до родителите, старателите, наставниците и јавноста да бидат внимателни во врска со насилната онлајн заедница позната како „764“, чии членови таргетираат деца, малолетници и други ранливи лица.
Според предупредувањето на МВР, целта на ваквите контакти може да биде манипулирање, заплашување и принудување на жртвите на опасни и насилни дејства. Од Министерството повикуваат опасноста да се препознае навреме и да се посвети внимание на безбедноста на децата на интернет.
За „764“ и за други насилни онлајн мрежи претходно предупреди и американското Федерално истражно биро – ФБИ. Според бирото, ваквите мрежи дејствуваат преку социјални мрежи, апликации за комуникација и платформи за онлајн игри што ги користат младите.
Според ФБИ, лицата што стојат зад ваквите активности често најпрво се обидуваат да воспостават однос на доверба. Може да се претстават како пријатели или да создадат впечаток на блискост, а потоа да почнат со манипулации и закани.
Откако ќе добијат лични информации, фотографии или други материјали, може да се обидат да ја уценуваат жртвата со закана дека ќе ги објават или ќе ги испратат до нејзиното семејство и пријателите.
ФБИ предупредува дека уцените може да вклучуваат притисок за создавање и споделување сексуално експлицитни материјали, самоповредување или други насилни дејства. Не секој сомнителен контакт на интернет е поврзан со „764“, но заканите и уцените треба сериозно да се сфатат и да се пријават.
Меѓу можните знаци на кои родителите и блиските треба да обрнат внимание се ненадејно повлекување од семејството и пријателите, промени во расположението, спиењето или исхраната, како и губење интерес за вообичаените активности.