Премиерот Христијан Мицкоски синоќа на настан во Велес по повод 35-годишнината од основањето на Унијата на млади сили на ВМРО-ДПМНЕ изрази критика кон начинот на кој, според него, опозицијата реагира на трагедијата во импровизираната дискотека „Пулс“ во Кочани во која загинаа 62 претежно млади лица.
„Таму гледаме полека како едно граѓанско движење за поддршка на Кочани полека преминува во политичко движење, каде од поддршка на ужасните жртви од ужасниот хорор во Кочани, говорат за катни гаражи, водоводи, канализации, исполнети неисполнети ветувања и се така по ред во духот на локалните избори“, рече Мицкоски.
Тој го нарече овој пристап „некрофилија“ и направи паралела со други случаи од поновата историја, како смртта на Тамара Димовска, Мартин Нешкоски и жртвите од Смилковското езеро.
„Да не дозволиме овие некрофили, кои повторно на човечката судбина манипулираат и се обидуваат да се вратат на власт“, рече Мицкоски пред младите симпатизери на ВМРО-ДПМНЕ.
Тој рече дека заедно со канцеларијата на Европската Унија интензивно работи на проект „од историско значење“ за Кочани.
„Со тоа што историски, епски, драматично ќе го видоизмениме изгледот на подобро, на градот Кочани“, рече Мицкоски најавувајќи детали наскоро.
Во останатиот дел од говорот, премиерот се обрати директно до младите, повикувајќи ги да останат во земјата и да се вклучат во изградбата на систем заснован на ред, одговорност и перспектива.
Тој им порача на младите да останат и да се борат, да не заминуваат.
„Македонија има потреба од вашиот ум, од вашата креативност, од вашиот немир што го менува светот. Јас подавам рака на младите и го немаме повеќе луксузот да не успееме. Вашата генерација мора да успее. Ова е последната шанса за успех“, рече премиерот.